annonse

E16 vert stengt natt til laurdag

E16
E16: Natt til laurdag vil E16 verta stengt ved Bolstad. (Foto: Statens vegvesen)

E16 mellom Dale og Voss er førebels open på dagtid fredag, men frå fredag kveld til laurdag morgon vert vegen stengt.

Esben Hesjedal

Det opplyser Statens vegvesen fredag i 12.30-tida.

– Førebels er eitt felt på E16 ope, og trafikken blir losa gjennom med leiebil.

Natt til fredag blei E16 stengd igjen etter at det blei oppdaga misfarging av vatnet i elva. For å vera føre var blei vegen då stengd.

– Elvene er no på dagtid fredag gått tilbake, og vatnet har fått sin vanlege farge igjen. Etter ei vurdering valde vi å sleppe trafikken gjennom med leiebil, seier byggjeleiar Bente Bergstø.

Det skal komme meir nedbør i løpet av fredagen og natt til laurdag, og nye vurderingar blir gjort fortløpande.

– Det vil seia at E16 kan bli stengd på kort varsel. På grunn av dei store nedbørsmengda som er varsla, kjem vegen uansett til å bli stengd frå kl. 20.00 fredag kveld til kl. 07.00 laurdag morgon. Det blir gjort ei ny vurdering laurdag morgon om vegen kan opnast for trafikk, seier Bergstø.

På fv. 7 er det beredskap med vakter som står klare til å dirigera trafikken om det blir naudsynt å stengja E16.

Når det gjeld Fv. 314 over Hamlagrø er vegen framleis stengd ved Øye, men forhåpentlegvis blir vegen opna i løpet av dagen. Ny vurdering vert gjort fredag kl. 15.00.

eh@vp.no

Klikk for å se kommentarar ()

Her kan du fritt koma med synspunkt og informasjon. Me krev fullt namn. Då vert det meir interessant for andre å lesa det du skriv. Trakassering, trugslar, hatske meldingar eller reklame vert ikkje akseptert på vaksdalposten.no. Falske profilar vert utestengde. Ver sakleg og vis respekt når du kommenterer.